2020 წლის ნოემბრიდან "კონკურენციის შესახებ" საქართველოს კანონში მნიშვნელოვანი ცვლილებები შედის. ცვლილებები განაპირობა ევროკავშირთან თავისუფალი სავაჭრო სივრცის შესახებ შეთანხებით ნაკისრმა ვალდებულებამ. აღსანიშნავია, რომ ცვლილებების განხორციელებამდე კანონი შეიცავდა არაერთ სისრემურ თუ პროცედურულ ხარვეზს, რაც კონკურენციის სააგენტოს ხელს უშლიდა საქმიანობის ეფექტურად განხორციელებაში. ცვლილებები მიზნად ისახავს სწორედ, ამ ხარვეზების აღმოფხვრას და კანონის აღსრულების მექანიზმების გაუმჯობესებას. მისი ძირითადი მიზანია ეფექტიანი და ყოვლისმომცველი კანონმდებლობის მიღება, რაც უზრუნველყოფს საქართველოში კონკურენციის განვითარებისთვის შესაბამისი გარემოს შექმნას და ამ გარემოს დასაცავად ყველა სახის "ანტიკონკურენტული" შეთანხმებისა თუ ქმედებების დაუშვებლობას.

განახლებული კანონის მიხედვით:

• ეკონომიკური აგენტები ვალდებულნი იქნებიან, რომ სააგენტოს მიაწოდონ ინფორმაცია როგორც საქმის მოკვლევის, ასევე, კონცენტრაციის შესახებ შეტყობინების განხილვის და მონიტორინგის პროცესში, რაზეც კანონში განხორციელებულ ცვლილებებამდე ვალდებულება არ გააჩნდათ;
• შეიცვალა და გაიზარდა საქმისწარმოების ვადები სხვადასხვა პროცედურასთან მიმართებაში, რაც მიზნად ისახავს სააგენტოსთვის დროის გაზრდას საკითხის საფუძვლიანად გამოკვლევისა და ეფექტურად გადაწყვეტისთვის;
• ეკონომიკური აგენტების შემოწმება განხორციელდება წინასწარი შეტყობინების გარეშე (აღნიშნულის თაობაზე ცვლილებები შევიდა ასევე ადმინისტრაციულ საპროცესო კოდექსშიც). ძველი რედაქციით პროცედურა ხორციელდებოდა სასამართლოს თანხმობით, თუმცა, სპეციალური პროცედურული ნორმების არარსებობის გამო, სასამართლო ხელმძღვანელობდა ზოგადი წესებით და წინასწარ ატყობინებდა ეკონომიკურ აგენტებს შემოწმების თაობაზე, რაც მათ აძლევდა დროს გაენადგურებინათკონკურენციის საწინააღმდეგო შეთანხმების დამადასტურებელი მტკიცებულებები. ცვლილებების შემდეგ ეს პრაქტიკა შეიცვლება და შესაბამისად, სასამართლო არ მოახდენს ეკონომიკური აგენტების წინასწარ ინფორმირებას, რაც მხარეთა შორის კომუნიკაციის დამადასტურებელი ფაქტების აღმოჩენას შეუწყობს ხელს;
• გაიმიჯნა კონკურენციის სააგენტოსა და მარეგულირებელ ორგანოებს შორის კომპეტენცია. მარეგულირებელ ორგანოებს მაინც რჩებათ საკუთარ სექტორებში კონკურენციის აღსრულების ვალდებულება, თუმცა ისინი იხელმძღვანელებენ "კონკურენციის შესახებ" კანონით.

მნიშვნელოვანია აღინიშნოს, რომ ცვლილებებამდე კანონში არ არსებობდა მისი დარღვევისათვის შესაბამისი სანქცია, რაც კანონის ეფექტურად აღსრულებას უშლიდა ხელს. განხორციელებული ცვლილებებით აღმოიფხვრება ეს ხარვეზები. სააგენტო უფლებამოსილია დააკისროს ჯარიმა ეკონომიკურ აგენტებს კანონით დაკისრებული მოთხოვნების შეუსრულებლობისას. ამასთან, ჯარიმის დაკისრებასთან ერთად, კონკურენციის სააგენტო უფლებამოსილია თავდაპირველი მდგომარეობის აღდგენის მიზნით სასამართლოს მიმართოს შუამდგომლობით და მოითხოვოს, რომ ეკონომიკურ აგენტს დაეკისროს სხვადასხვა ვალდებულების შესრულება, მათ შორის საწარმოს, წილების, აქტივების გასხვისება, ასევე რეორგანიზაციის განხორციელება, ხელშეკრულების შეწყვეტის ვალდებულება და სხვა.